Qaaccessa Barjaa Magaalaa Gaangoaa Hiika Jijjiirraa Jechoota Afaan Oromoo Irratti Xiyyeeffachuun

Kaayyoon qorannoon kana caasaafi hiika jijjiirraa jechoota Afaan Oromoo barjaa/Taappellaa magaalaa Gaango’aa qaaccessuudha. Qorannichis caasafi hiika jijjiirraa jechoota Afaan Oromoo barjaaa magaalaa Gaango’aarratti xiyyeefata. Dabalataan dhiibbaa isaan qaqqabsiisaniifi karaalee furmaata argatanirratti xiyyeeffateera. Kaayyoo qorannichaa galmaan ga’uufis meeshaaleen funaansa ragaalee lama; daawwannaafi af-gaaffitti dhimma bahee jira. Haaluma kanaan barjaaleen daandirra jiran suuraa kaasuun kan fudhataman yoo ta’u, qaamota dhimmi ilaalaturraa ammoo af-gaaffii caaseffamaa qopheessuun ragaan walitti qabameera. Ragaaleen walitti qabamanis mala akkamtaafi ammamtaan, akkaataa walitti dhiyeenyasaanitiin walkeessa nyaachifamuun qaacceffaamuun hiikni itti laatameera. Argannoon qorannichaa akka mul’isutti akkaataan fayyadama caasaa; qubeessuu, fayyadama dhamjechaa, hanqina caasaa gaalee maqaa, fayyadama mul’istuu abbummee, duraaduuba jechootaa, hanqinoonni jijjiirraa jiraachuu isaanii bira gahameera. Isaan kun ammoo jechoonni ergaa barbaadame osoo hintaane hiika biroo akka dabarsan, yookiin hiikaa akka dhaban, jechoonni afaanichaa akka hinwaaltofne, jechoonni afaanichaa dhaabaakka dhaban, caasaa Afaan Amaaraa yookiin Ingilizii afaanichaaf oolchuun dhiibbaa inni geesisuudha. Beekumsa xiinqooqa Afaan Oromoo dhabuu, dhiibbaa caasaa Afaan Amaaraa yookiin Ingilizii, xiyyeeffannoo kennuufi dhabuu waajjira aadaafi turizimii kaateesaa ta’uun bira gahameera.Dhumarrattis qoratichi namoota hojii beeksisaa magaalicha keessatti hojjechuu barbaadaniif raga beekumsa Afaan Oromoofi aadaa Oromoo qabaachuusaanii mul’isu adda baasuun heeyyama daldalaa kennuu, ogummaasaanii leenjiin gabbisuu, hordofuufi too’achuu, kan kana bira tare tarkaanfii seeraa irratti fudhachuu, waajjirri aadaafi turizimii dhimmicha karoora hojii keessa galfachuun irratti hojjechuun furmaata rakkoo kanaa ni ta’a jedha.

Get Full Work

Report copyright infringement or plagiarism