Qorannoon kun kan irratti xiyyeeffatu Qaaccessa barreeffamoota hojjettoota mootummaa waajjiraalee mootummaa Godina Arsii Aanaa Colleeti. Matadureen qorannoo kun akka qoratamu qoratichaaf kaka`umsa kan ta`e; yeroo baay`ee barreeffamoota hojjettoota mootummaa irratti hanqina mul`atu ilaalchisee qeeqa namoota garaagaraatiin dhiyaataniidha. Akkasumas, hayyoota afaanii garaagaraatiin komii waltajjii leenjii garaagaraa irratti dhagaa`amaniidha. Kanaafuu, kaayyoon qorannoon kun qabatee ka`e barreeffamoota hojjeettoota mootummaa waajjiraalee mootummaa xiinxaluudha. Mataduree qorannoo kanaa ijaaruudhaaf kitaabileen garaagaraa sakatta`amanii akka sakatta`a barruutti qorannicha keessatti hammatamanii jiru. Qorannoo kana geggeessuuf malli qoratichi itti dhimma bahe mala makaadha (mixed) mala kanaan odeeffannoos funaannatee jira, akkasumas ragaalees xiixalee jira. Dabalataanis, meeshaalee ragaan ittiin funaanaman garaagaraa: bargaaffii, af-gaaffii, sakatta`a dookimantiitti dhimma bahamee jira. Bifa kanaan, ragaalee cunfame kanarraa argannoon qoratichaa: barreeffamoota Hojjettoota mootummaa keessa hanqinni jiraachuu qoratichi adda baasee jira;Dogoggorri barreeffamoota isaanii keessatti mul`atanis:seeraan qubeessuu dhabuu, sirna tuqaaleetti seeraan fayyadamuu dhabuufi caasaa afaanichaa akkaataa seerri isaa ajajuun gargaaramuu dhabuu akka ta`e mul`ate jira; Maddi dogongora barreessuu isaanii: xiyyeeffannaa ittikennuu dhabuu, gahumsa barbaachisu fayyadama afaaniirratti dhabuufi leenjiin yeroo yeroon hojjettoota mootummaaf ogummaa barreessuurratti kennamuu dhabuu akka ta`e adda baafamee jira. Kana bu`uureffachuun qoratichi yaada furmaataa kennee jira: Hojjettoonni mootummaa waajjiraalee mootummaa keessaa hojjetan barreeffama mana hojii Afaan Oromoon wayita barreessan qubeessuu, sirna tuqaaleefi caasaa afaanii irratti xiyyeeffachuun gaarii ta`a. Qaamoleen Mootummaas hanqina barreessuu hojjettoota mootummaa biratti mul`atan kana furuuf ogeessota afaanii waliin ta`uun leenjii hojiirraa yeroo yeroon osoo fudhachiisanii filatamaadha. Dabalataanis, gulaalaan barreeffamoota hojjettoota mootummaa ogeessi afaanii utuu waajjiraalee hunda keessa jiraateefi hanqina kana furuuf moosaajiin (software) Afaan Oromoo osoo qophaa`ee shora guddaa qaba jechuun qoratichi yaada furmaata ta`us eeree jira.